Davao City – Tinatayang aabot sa halagang Php1,830,000 ang nakumpiska sa isang High Value Individual sa isinagawang buy-bust operation ng Sta. Ana PNP sa Purok 4 Brgy. Communal, Davao City, noong Hunyo 20, 2023.
Kinilala ni PLtCol Ronald Lim Lao, Station Commander ng Sta. Ana Police Station, ang suspek na si alyas “Boss”, 35, residente ng Brgy. Communal, Davao City at tinaguriang Top 2 High Value Individual sa City level.
Ayon kay PLtCol Lao, naaresto ang suspek sa isinagawang buy-bust operation ng pinagsamang tauhan ng Sta. Ana PS at Special Operation Group/City Drug Enforcement Unit at sa pakikipag-ugnayan sa Buhangin PS.
Dagdag pa ni PLtCol Lao, nakuha mula sa suspek ang ilang pakete ng hinihinalang shabu na may bigat na humigit kumulang 114.57 gramo na may street market value na Php1,833,120 at ang marked money na ginamit sa operasyon.
Mahaharap sa kasong paglabag sa Republic Act 9165 o Comprehensive Dangerous Drugs Act of 2002 ang nasabing suspek.
Pinuri naman ni PBGen Alden Delvo, PRO11 Regional Director ang matagumpay na pagkakadakip sa suspek na malaking kabawasan sa paglaganap ng ilegal na droga sa Rehiyon Onse.
Panulat ni Patrolman Alfred Vergara
