Cebu – Tinatayang nasa Php1.7 milyong halaga ng shabu ang nakumpiska ng mga operatiba ng Cebu PNP matapos ang isinagawang buy-bust operation sa isang tulak ng ilegal na droga sa Barangay Kawit, Medellin, Cebu nito lamang Sabado, Abril 29, 2023.
Kinilala ni Police Colonel Rommel Ochave, Provincial Director ng Cebu Police Provincial Office, ang nadakip na si “ArnelL”, 34, residente ng Barangay Lorega, San Miguel, Cebu City.
Ayon kay PCol Ochave, dakong 1:50 ng hapon ng ikasa ng mga operatiba ng Police Intelligence Unit/Police Drug Enforcement Unit katuwang ang mga tauhan ng Medellin Police Station sa pangunguna ni Police Captain Michael Sevilla ang operasyon na humantong sa pagkakaaresto ng suspek matapos maberipika ang mga ilegal na aktibidad ng naturang suspek.
Nakumpiska mula rito ang tinatayang nasa 250 gramo ng hinihinalang shabu na may Standard Drug Price na Php1,700,000, isang white sling bag na ginamit bilang lagayan ng mga ilegal na droga at ang buy-bust money.
Kasalukuyang dinala ang suspek sa CPPO Custodial Facility na nahaharap sa kasong paglabag sa Section 5 at 11, Article II ng RA 9165 o ang Comprehensive Dangerous Drugs Act of 2002.
Patuloy na pinapaigting ng buong hanay ng Cebu Police Provincial Office, ang kampanya kontra ilegal na droga upang masawata ang mga personalidad na nasa likod ng kalakalan ng ilegal na droga sa lalawigan ng Cebu.
