Nakumpiska ang tinatayang Php1.5 milyong halaga ng shabu sa isinagawang drug buy-bust operation ng mga operatiba ng Kalilangan Municipal Police Station na nagresulta sa pagkakaaresto sa isang High Value Individual sa P-6, Barangay West Poblacion, Kalilangan, Bukidnon nito lamang Enero 31, 2025.
Kinilala ni Police Captain Romeo M Arcilla, Officer-In-Charge ng Kalilangan MPS, ang naarestong suspek na si alyas “Mon”, isang High Value Individual, 26 anyos at residente ng Muslim Village, Wao, Lanao del Sur.
Nakumpiska sa suspek ang iba’t ibang sukat na pakete ng hinihinalang shabu na may timbang na 233.35 gramo at may halagang aabot sa Php1,586,780 at iba pang non-drug evidence.
Ang pagkakaaresto sa High Value Individual na suspek ay bunga ng matagumpay na kampanya kontra ilegal na droga ng Kalilangan PNP na patuloy na ginagampanan ang sinumpaang tungkulin para sa maayos at mapayapang pamayanan tungo sa Bagong Pilipinas.
