Cebu – Timbog ang isang suspek sa buy-bust operation ng Mandaue City Police Office makaraang makumpiskahan ang nasa higit Php1.5 milyong halaga ng shabu at baril sa Zone Ahos, Brgy. Paknaan, Mandaue City, Cebu noong ika-25 ng Mayo 2023.
Kinilala ni Police Colonel Jeffrey Caballes, City Director ng Mandaue City Police Office, ang nadakip na si “Brinbren”, 32, residente ng Magsaysay St., Brgy. Suba, Cebu City at nakatala bilang High Value Individual.
Ayon kay PCol Caballes, ikinasa ang operasyon pasado alas-12 ng madaling araw noong Huwebes ng mga operatiba ng Police Station 3, MCPO sa pangunguna ni Police Captain Emmanuel Rabaya, Station Commander.
Nakumpiskq sa operasyon ang nasa 230.33 gramo ng hinihinalang shabu na may Standard Drug Price na Php1,566,244, isang unit ng cal. 45 pistol BCG PRO na loaded ng apat na live ammunition.
Nahaharap ang suspek sa kasong paglabag sa RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Ang matagumpay na operasyon ay bunga ng pinaigting at walang humpay na pagbibigay katuparan ng kapulisan ng kanilang hakbangin at tungkulin sa pagpapanatili ng kaayusan at kaligtasan ng mamamayan.
