Tuba, Benguet – Nasabat ang Php1,400,000 halaga ng marijuana sa dalawang suspek matapos maaksidente ang kanilang sasakyan sa Kennon Road, Brgy. Camp 4, Tuba, Benguet nito lamang Linggo, Hulyo 3, 2022.
Kinilala ang mga suspek na sina Jimsie Galang Salazar, 40, residente ng Bacoor, Cavite, driver ng sasakyan at Justine Jerome Baisa, residente ng San Mateo, Rizal.
Ayon sa ulat, rumesponde ang mga tauhan ng Baguio City Police Office -Kennon Road Station at Tuba Municipal Police Station sa isang vehicular accident sa nasabing lugar na kinasangkutan ng isang Chili Orange Ford Ranger Pick-up na may plakang ABC 3265 na nakarehistro sa pangalang Junerodel H Rios.
Kasabay nito, ipinarating ng isang residente ng nasabing lugar na nakita niya umano ang mga suspek na may tinapong karton sa tabing ilog.
Kaya naman nagsagawa agad ng ocular inspection ang mga kapulisan at kanilang nadiskubre ang 12 piraso ng mga pinatuyong marijuana na may tinatatayang timbang na 12 kilograms at may Standard Drug Price na Php1,400,000.
Ang mga naarestong suspek ay mahaharap sa kasong paglabag sa RA 9165 o ang Comprehensive Dangerous Drugs Act of 2002.
###
