Kumpiskado sa maglive-in partner ang aabot sa Php1.4 milyong halaga ng shabu at isang baril, sa ikinasang buy-bust operation ng Bacolod City PNP sa Purok Magnolia, Brgy. 7, Bacolod City, nito lamang umaga ng Enero 14, 2024.
Kinilala ni Police Captain Joven Mogato, Hepe ng Bacolod City Drug Enforcement Unit, ang mga suspek na sina alyas “Col”, babae, isang High Value Individual, at si alyas “Romel”, na kabilang naman sa Street Level Individual drug pusher.
Ayon kay PCpt Mogato, nakumpiska sa dalawang suspek ang 206 gramo ng pinaghihinalaang shabu na nagkakahalaga ng aabot sa Php1,400,800, at buy-bust money.
Maliban sa pinaghihinalaang shabu nakuha din kay alyas “Romel” ang isang 9mm na baril kasama na ang mga bala nito.
Ayon naman kay Bacolod City Police Office Director, PCol Noel C Aliño, ang pagkakaaresto sa dalawang tulak ng droga ay isa lamang sa naging bunga ng intelligence driven operation ng ating kapulisan upang matigil na ang pagkalat ng mga ilegal na droga sa siyudad ng Bacolod.
Sa ngayon, nakakulong na ang dalawa sa himpilan ng Bacolod City Police Station 2, at sila ay nahaharap sa kasong paglabag sa RA 9165 o ang Comprehensive Dangerous Drugs Act of 2002 at dagdag naman ang kaso kay “Romel” ang paglabag sa RA 10591, Section 28 para sa illegal possession of fire arms.
Sa masugid na pagtutulungan ng ating mga kapulisan at mamamayan ay maisasakatuparan ang isang drug free na bansa.
