Caloocan City — Umabot sa Php1.3 milyong halaga ng shabu ang nakumpiska sa dalawang tinaguriang High Value Individual (HVI) sa ikinasang buy-bust operation ng District Drug Enforcement Unit ng Northern Police District (NPD) nito lamang Linggo, Mayo 7, 2023.
Kinilala ni Police Brigadier General Ponce Rogelio Peñones Jr., District Director ng NPD, ang mga suspek na sina alyas “Tintin”, babae, 28; at alyas “Von”, lalaki, 23; pawang mga residente ng Caloocan City.
Ayon kay PBGen Peñones Jr, naganap ang operasyon bandang 11:25 ng gabi sa harap ng bahay sa no. 195 Velasco St., Brgy. 7, Lungsod ng Caloocan na nagresulta sa pagkakadakip sa mga suspek.
Nasamsam ng mga awtoridad ang tatlong knot-tied transparent plastic bag at isang pirasong medium size na heat-sealed transparent plastic sachet na parehong naglalaman ng pinaghihinalaang shabu na tinatayang 205 gramo at may Standard Drug Price (SDP) na Php1,394,000; isang Php500 na may kasamang sampung piraso na Php1,000 boodle money na ginamit bilang buy-bust money; isang digital weighing scale; at isang Eco Bag na kulay pink.
Paglabag sa RA 9165 o Comprehensive Dangerous Drugs Act of 2002 ang kahaharapin nina alyas “Tintin” at “Von”.
Ang matagumpay na operasyon ng Northern Police ay sa pamamagitan ng suporta ng komunidad na syang tumutulong upang maiwasan ang paglaganap ng ilegal na droga at masamang epekto nito sa kanilang nasasakupang lugar.
Source: NPD PIO
Panulat ni PSSg Remelin M Gargantos
