Taguig City – Tinatayang Php1,360,000 milyong halaga ng shabu ang nakumpiska sa isang High Value Individual (HVI) sa isinagawang buy-bust ng Taguig City PNP nitong Huwebes ng gabi, Mayo 5 ,2022.
Kinilala ni District Director Police Brigadier General Jimili Macaraeg ng Southern Police District ang naarestong suspek na si Akmad Sumlay y Sakilan alyas “Tukoy” (HVI), 30, driver.
Ayon kay PBGen Macaraeg, dakong 7:00 ng gabi ay nahuli si Sumlay sa kahabaan ng Roldan Street, Purok 2 Brgy. New Lower, Taguig City ng Drug Enforcement Unit (SDEU) ng Taguig City Police Station.
Nakumpiska kay Sumlay ang limang heat-sealed transparent plastic sachet na naglalaman ng hinihinalang shabu na humigit-kumulang 200 gramo at may Standard Drug Price (SDP) na Php1,360,000, isang tunay na Php1000, 39 pirasong Php1000 na ginamit bilang buy-bust money, maroon belt bag, at digital weighing scale.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
“Lubos kong ikinatutuwa ang kasipagang ipinapakita ng ating mga pulis sapagkat sa kabila ng aming mahigpit na pagbabantay sa nalalapit na eleksyon, hindi pa rin nila kinakalimutan ang mahigpit na kampanya sa ilegal na droga na nagresulta sa pagkakadakip ng isang HVI at pagkakumpiska ng milyong halaga ng ilegal na droga. Amin pong sinisiguro na hindi kami mapapagod sa aming sinumpaang tungkulin upang labanan ang ilegal na droga, kriminalidad at terorismo” ani PBGen Macaraeg.
Source: SPD PIO
###
Panulat ni PSSg Remelin Gargantos
