Imus City, Cavite – Tinatayang nasa Php1,360,000 halaga ng shabu ang nakumpiska sa dalawang suspek sa pinagsamang operasyon ng Cavite PNP nitong Miyerkules, Hunyo 8, 2022.
Kinilala ni Police Colonel Arnold Abad, Provincial Director ng Cavite Police Provincial Office, ang mga suspek na sina Sandro L Toledo, 35, walang trabaho, at Cecille P Pakingan, 40, walang trabaho, pawang mga residente ng Brgy. H2, Dasmariñas City, Cavite.
Ayon kay PCol Abad, bandang 3:00 ng hapon naaresto ang dalawang suspek sa naturang barangay ng pinagsanib pwersa ng Station Drug Enforcement Unit ng Dasmariñas City Police Station at Criminal Investigation and Detection Group-Cavite.
Nakumpiska sa dalawang suspek ang limang pirasong heat-sealed plastic sachets na hinihinalang shabu, dalawang pirasong knot tied plastic bag na naglalaman ng hinihinalang shabu na may tinatayang bigat na 200 gramo na nagkakahalaga ng Php1,360,000, isang pouch, isang shoulder bag at isang Php500 bill na ginamit bilang buy-bust money.
Nahaharap ang dalawang suspek sa kasong paglabag sa Article II, RA 9165 o Comprehensive Dangerous Drugs Act of 2002.
Ang tagumpay ng PNP sa pagdakip sa mga suspek ay naging posible sa pamamagitan ng aktibong suporta ng mamamayan at sa matibay na pangako ng PNP na ipagpatuloy ang pinaigting na pagpapatupad ng batas para mapanatiling ligtas at maayos ang komunidad.
Source: Cavite Police Provincial Office-PIO
###
Panulat ni Patrolman Mark Lawrence Atencio/RPCADU 4A
