Quezon City — Nasamsam ang tinatayang Php1.36 milyong halaga ng shabu sa isang lalaking suspek sa isinagawang buy-bust operation ng District Drug Enforcement Unit (DDEU) ng Quezon City Police District nito lamang Linggo, Hulyo 9, 2023.
Kinilala ni QCPD Director, PBGen Nicolas Torre lll, ang suspek sa pangalang Ruben, 40, at residente ng Project 8 Bahay Toro, Quezon City.
Ayon kay PBGen Torre lll, dakong 7:10 ng gabi naganap ang operasyon dahil sa sumbong ng isang concerned citizen tungkol sa ilegal na aktibidad ng pagbebenta ng droga ng suspek.
Isang pulis ang nagsilbing poseur buyer at bumili ng Php79,000 halaga ng shabu sa suspek sa harap ng Lot 5, Blk. 16, Congressional Ave., Brgy. Bahay Toro, Quezon City na naging dahilan ng kanyang pagkakadakip.
Nakumpiska ng mga operatiba ang 200 gramo ng shabu na nagkakahalaga ng Php1,360,000; isang cellular phone, buy-bust money; at isang (1) puting PCX160 Honda motorcycle na may plate number 860PJV.
Paglabag sa R.A. 9165 o ang Comprehensive Dangerous Drugs Act of 2002 ang kahaharapin ng suspek.
“Nais kong hilingin ang patuloy na kooperasyon at suporta ng ating QCitizens sa ating laban sa ilegal na droga. Magtulungan po tayo. Dial 122 kung kayo po ay may nais ireport na mga ilegal na gawain para mabigyan namin ng agarang aksyon,” ani PBGen Torre III.
Source: PIO QCPD
Panulat ni PSSg Remelin M Gargantos
