Zamboanga del Sur – Tinatayang Php1,200,000 halaga ng smuggled cigarettes ang nakumpiska ng mga awtoridad na nagresulta sa pagkakadakip ng dalawang indibidwal sa ikinasang joint checkpoint operation sa Purok 2, Brgy. Lower Landing, Dumingag, Zamboanga del Sur bandang 6:40 ng gabi nito lamang Mayo 16, 2023.
Kinilala ni Police Major Marlon Mangan-nay, Officer-In-Charge ng Dumingag Municipal Police Station, ang dalawang suspek na sina alyas “Adrian”, 39, drayber, may asawa, residente ng Brgy. Olingan, Dipolog City at alyas “Ahmedjoem”, 19, truckman, may-asawa, residente ng Purok Narra, Brgy. Palomoc, Titay, Zamboanga Sibugay.
Dagdag pa ni PMaj Mangan-nay, naharang sa naturang operasyon ang isang Mitsubishi L300 van na may Plate Number YEG 361 na may kargang 39 Master Cases at 50 rims ng D&J Cigarettes kulay pula na may tinatayang halaga na umaabot sa Php1,200,000.
Naging matagumpay ang operasyon dahil sa pagsisikap ng Dumingag PNP, Zamboanga del Sur 1st Provincial Mobile Force Company at Anti-Criminality Task Force Group ng Zamboanga del Sur Police Provincial Office.
Samantala, patuloy ang Zamboanga del Sur PNP sa pagpapanatili ng katahimikan at kaayusan sa kanilang nasasakupan at nanawagan sa komunidad na i-report sa kanilang himpilan ang mga ilegal na gawain ng mga masasamang loob na walang ibang dala kundi karahasan na hadlang sa pagkamit ng kaunlaran sa ating pamayanan.
Panulat ni PSSg Grace Neville Ortiz
