Arestado ang isang lalaking High Value Individual matapos makuhanan ng mahigit Php1.2 milyong halaga ng shabu sa ikinasang buy-bust operation ng mga awtoridad sa Barangay Kalaisan, Kidapawan City, North Cotabato nito lamang Hulyo 10, 2024.
Kinilala ni Police Brigadier General Percival Augustus Placer, Regional Director ng Police Regional Office 12, ang suspek na si alyas “Yan-yan”, 45 anyos, magsasaka at residente ng Barangay Conel, General Santos City.
Bandang 8:00 ng gabi nang isinagawa ng mga operatiba ng Regional Police Drug Enforcement Unit 12, Kidapawan City Police Station, Regional Special Operation Group 12, Regional Intelligence Unit 12, PDEG SOU 12, at North Cotabato Highway Patrol Team ang buy-bust operation na nagresulta sa pagkadakip ng suspek.
Aabot naman sa 181 gramo ng hinihinalang shabu ang nakumpiska sa suspek na may tinatayang halaga na Php1,230,800.
Nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang suspek.
Ang matagumpay na operasyon ay resulta ng walang humpay na pagsugpo at kampanya ng PNP sa pagpapatupad ng batas para makamit ang mas maayos, tahimik at drug-free na rehiyon.
Panulat ni Patrolwoman Vina C Morales
