Bacolod City – Tinatayang nasa 174 grams ng shabu na may Standard Drug Price na Php1,183,200 ang nakumpiska ng Bacolod City PNP sa isang buy-bust operation sa Bacolod City nito lamang Biyernes ng madaling araw, Mayo 13, 2022.
Kinilala ni Police Colonel Thomas Joseph Martir, City Director ng Bacolod City Police Office, ang mga suspek na sina Pearl Je-Ann Elera, 26 at Riegel Troy Quimba, 20, parehong mga High Value Individual at residente ng Purok Kapawa, Barangay Punta, Taytay, Bacolod City.
Ayon kay Police Colonel Martir, nakumpiska ng mga operatiba ng Bacolod City Police Office City Drug Enforcement Unit sa mga suspek ang Php1,500 na marked money, Php200 cash proceed, isang sling bag, 32 piraso ng heat-sealed transparent plastic sachet ng hinihinalang shabu at isang knot-tide transparent plastic bag na naglalaman din ng parehong ipinagbabawal na droga.
Ang mga suspek ay nahaharap sa kasong paglabag sa R.A. 9165 o Comprehensive Dangerous Drugs Act of 2002.
Samantala pinuri naman ni PCol Martir ang mga operatiba sa matagumpay na drug buy-bust operation at patuloy pang hinimok ang publiko na makipagtulungan sa PNP upang matuldukan ang problema na may kaugnayan sa mga ipinagbabawal na droga at iba pang uri ng krimen sa nasabing lungsod.
###
