Arestado sa isinagawang buy-bust operation ng mga tauhan ng Southern Police District ang dalawang High Value Individual (HVI) at nakumpiska ang mahigit Php1,108,400 halaga ng shabu sa Barangay Central Bicutan, Taguig nito lamang Lunes, Disyembre 2, 2024.
Kinilala ni Police Brigadier General Bernard Yang, District Director ng SPD, ang mga naarestong suspek na si alyas “Jepoy”, isang 30 taong gulang; at alyas “John Paul”, 32 anyos kasama si alyas “Shawn”, 17-anyos, estudyante.
Ayon kay PBGen Yang, naganap dakong 11:00 ng gabi ang operasyon sa pangunguna ng SPD Drug Enforcement Unit sa pakikipagtulungan ng Philippine Drug Enforcement Agency-Southern District Office, DID, DSOU, DMFB at Taguig City Police Sub-station 7 na humantong sa pagkakahuli ng mga suspek.
Nasabat ng mga awtoridad ang hinihinalang ilegal na droga na may halagang Php1,108,400, isang kalibre .45 na pistol, pitong bala, buy-bust money na binubuo ng tunay na Php1,000 bill kasama ang 49 pirasong Php1,000 na boodle money, isang Android phone, at isang sling bag.
Nahaharap ang mga suspek sa kasong paglabag sa Section 5 at 11 ng Republic Act 9165 o “Comprehensive Dangerous Drugs Act of 2002” at RA 10591 o mas kilala din bilang “Comprehensive Firearm and Ammunition Regulation Act”.
Samatala, ang menor-de-edad na suspek ay nasa pangangalaga ng DSWD o Department of Social Welfare and Development.
Patuloy ang Southern Metro Cops sa pagpapanatili ng kaayusan at katahimikan tungo sa ating kaunlaran.
Source: SPD PIO
