Marikina City — Umabot sa mahigit Php1.1 milyong halaga ng shabu ang nakumpiska sa limang drug suspect sa buy-bust operation ng Marikina City Police Station nito lamang Martes, Enero 10, 2022.
Kinilala ni NCRPO Regional Director, PMGen Jonnel Estomo ang mga suspek na sina alyas “Mark”, 26; alyas “Ci”, 31; alyas “Ton”, 45; alyas “Aya”, 32; at isang disisyete anyos na menor de edad.
Ayon kay PMGen Estomo, dakong 9:30 ng gabi nang maaresto ang mga suspek sa no. 8 4th St., Goodrich Village, Brgy. Concepcion Uno, Marikina City ng mga operatiba ng Station Drug Enforcement Unit ng Marikina CPS-EPD.
Narekober sa mga suspek ang isang knot-tied transparent plastic, tatlong small sized at tatlong medium heat-sealed transparent plastic sachet na pawang hinihinalang shabu na tumitimbang ng humigit kumulang 165 gramo at nagkakahalaga ng Php1,112,000; isang belt bag na kulay berde; isang Suzuki Raider 150 color black na may plate no. na 645UBB; at isang Php500 na ginamit na buy-bust money.
Mahaharap ang apat na suspek sa kasong paglabag sa RA 9165 o “Comprehensive Dangerous Drugs Act of 2002” samantala ang menor de edad naman ay sasailalim sa pangangalaga ng DSWD.
“I commend the unwavering effort of EPD in the implementation of our anti-illegal drugs campaign. Ang malaking halaga ng shabu na ating nakumpiska ay malaking kabawasan sa paligid ng ilegal na droga sa ating rehiyon. Patunay ito ng ating kampanya sa paglaban sa laganap na paggamit at pagbebenta ng ilegal na droga sa ating komunidad,” ani PMGen Estomo.
Source: PIO NCRPO
Panulat ni PSSg Remelin M Gargantos
