Umabot sa mahigit Php1 milyong halaga ng shabu ang nasakote sa isinagawang anti-illegal drug operation ng mga tauhan ng Regional Drug Enforcement Unit-NCRPO sa Las Piñas City nito lamang Martes, ika-9 ng Abril 2024.
Kinilala ni NCRPO Regional Director, PMGen Jose Melencio C Nartatez Jr, ang suspek na si alyas “Pare”, 23 taong gulang at tinaguriang isang High Value Individual (HVI).
Ayon kay PMGen Nartatez Jr, naganap bandang 5:00 ng hapon ang operasyon, sa kahabaan ng Coastal Road, Barangay Daniel Fajardo, Las Piñas City sa pinagsanib puwersa ng RDEU-NCRPO Southern Police District-DDEU at SDEU, Las Piñas City Police Station na humantong sa matagumpay na pakakadakip sa suspek.
Sa kasamaang palad, nanlaban pa diumano ang suspek at nakuha ang baril ng pulis. Habang nagpupumiglas, aksidente itong nakalabas at natamaan ng bala sa binti ang suspek kaya kaagad siyang isinugod sa Las Piñas General Hospital at kalaunan ay pinalabas pagkatapos ng medikal na paggamot.
Mahaharap ang suspek sa kasong paglabag sa Section 5 (Selling of Drugs) ng Republic Act 9165 o mas kilala bilang Comprehensive Dangerous Drugs Act of 2002.
Pinuri ng PMGen Nartatez Jr, ang operating unit para sa kanilang walang patid na pagsisikap na maglunsad ng mga operasyong nakatuon sa pagsugpo sa paglaganap ng ilegal na droga. “Tiyakin na ang NCRPO ay patuloy na palakasin ang ating mga kampanya, gamit ang lahat ng magagamit na mapagkukunan, at paigtingin ang pakikipag-ugnayan ng komunidad upang labanan ang banta ng droga sa rehiyon,” ani pa niya.
Source: RPIO NCRPO
Panulat ni PSSg Remelin M Gargantos
