Ipinag-utos ni Philippine National Police (PNP) Chief, Police General Guillermo Lorenzo T. Eleazar sa Police Regional Office 5 ang malalimang imbestigasyon sa insidente ng pagsabog sa loob ng Legazpi City Campus ng Bicol University noong Linggo ng gabi.
“Nagbaba na ako ng kautusan sa RD, PRO5 PBGen Jonnel Estomo na tutukan ang imbestigasyon at tiyakin na mapapanagot ang may gawa nito lalo na at ang Bicol University Legazpi Campus kung saan naganap ito sa tapat lamang ng Regional Headquarters ng PNP,” ani PGen Eleazar.
Ayon sa report, bandang 6:00 PM nang mangyari ang magkasunod na pagsabog kung saan agad na rumesponde ang PNP Explosives and Ordnance Group.
Wala namang naitalang nasaktan sa insidente.
Inutos din ng hepe na makipag-ugnayan sa mga opisyal ng unibersidad para pag-usapan ang mga gagawing hakbang upang matiyak ang seguridad sa lugar at hindi na maulit muli ang insidente ng pagsabog.
“Wala mang masyadong aktibidad ng mga estudyante at mga guro sa loob ng campus dahil sa pandemya, kailangang alerto pa rin ang ating kapulisan laban sa mga ganitong uri ng pag-atake,” dagdag aniya.
Nanawagan din si Chief PNP sa mga nakakaalam ng impormasyon na maaaring magturo sa mga suspek na tulungan ang mga awtoridad sa pag-iimbestiga ng naturang insidente.
Photo Courtesy: bulgaronline.com
####
Article by Police Corporal Josephine T Blanche
