Binigyang diin ni Police Brigadier General Jean Fajardo, Regional Director ng Police Regional Office 3, ang mas pinaigting na presensya ng pulisya sa mga komunidad sa buong Gitnang Luzon sa isinagawang command conference sa Camp Olivas, Pampanga nito lamang Hunyo 6, 2025.
Ani PBGen Fajardo, ang kahalagahan ng pagtatatag ng mga fixed visibility points at checkpoint bilang bahagi ng kampanya para sa seguridad at kaayusan sa rehiyon.
Kabilang din sa mga direktiba ang pagpapalakas ng kakayahan ng mga istasyon ng pulisya sa pamamagitan ng pag-upgrade ng radio communication systems at regular na pagsusuri ng kagamitan upang matiyak ang kahandaan sa operasyon.
Bilang bahagi ng pagpapabuti ng kondisyon ng mga tauhan, iniutos din ni PBGen Fajardo ang mahigpit na pagsunod sa eight-hour duty policy ng PNP, na gumagamit ng three-shift system: 6 A.M. hanggang 2 P.M., 2 P.M. hanggang 10 P.M., at 10 P.M. hanggang 6 A.M.
Layunin nito na mapanatili ang kalusugan, kahusayan, at pagiging alerto ng mga pulis.
“We must stand united in preserving discipline and professionalism within our ranks. Bilang mga lider, tungkulin nating itaas ang pamantayan ng integridad at serbisyo. Bilang mga tagapangalaga ng kapayapaan, hindi tayo mag-aatubiling magpatupad ng disiplina sa sinumang lalabag sa ating pangunahing mga halaga,” pahayag ni RD Fajardo.
