Tatlong pulis mula sa Bayambang Municipal Police Station ang nagpakita ng mabilis at tapat na serbisyo sa publiko sa madaling araw ng March 16, 2026, nang kanilang tulungan ang isang pasahero ng isang bus na nawalan ng malay dahil sa pinaniwalaang epileptic seizure.
Ayon sa ulat, habang nagbabalik mula sa pagsusumite ng drug evidence sa Crime Laboratory sa Urdaneta, sina PSSg Mark Allan Beltran, PCpl Darwin Raza, at Patrolman Jonathan Octavo ay hinarang ng konduktor ng bus upang agad na maiparating ang pangangailangan ng pasahero.
Agad nilang inilipat ang pasahero sa kanilang patrol car at dinala sa Dr. Marcelo Memorial Hospital sa Rosales, Pangasinan, kung saan siya ay nakatanggap ng agarang medikal na atensyon.
Ang pasahero ay kasalukuyang nasa maayos na kalagayan. Agad ding naipaalam ng mga pulis sa pamilya ng pasahero ang sitwasyon gamit ang numerong nakalagay sa kanyang identification.
Sa kanyang pahayag, binigyang-diin ni Police General Jose Melencio C. Nartatez Jr., Chief PNP, ang kahalagahan ng agarang aksyon at malasakit sa kapwa.
“Ang mabilis at tamang pagresponde sa ganitong sitwasyon ay nagpapakita ng malasakit at dedikasyon ng bawat alagad ng batas,” ani PGEN Nartatez.
Ang natatanging aksyon ng tatlong pulis na ito ay patunay sa Bagong PNP para sa Bagong Pilipinas: Serbisyong Mabilis, Tapat at Nararamdaman, na naninindigan sa proteksyon at kapakanan ng bawat Pilipino.
(PNP-PIO)
