Cebu – Pormal nang sinimulan ng Police Regional Office 7 ang livelihood program na handog para sa mga kababaihan, ang “Panginabuhian alang sa Kababayen-an” sa Brgy. Cantipay, Carmen, Cebu nito lamang Huwebes, Mayo 18, 2023.
Ang aktibidad ay pinangunahan ni Police Brigadier General Anthony Aberin, Regional Director ng PRO 7, kasama ang kanyang maybahay na si Gng. Melinda Aberin.
Dumalo rin sa programa ang miyembro at Hepe ng Regional Community Affairs and Development Unit 7 sa pangunguna ni Police Colonel Amelie Santos; Chief CADU CPPO, Police Lieutenant Colonel Leo Ty; Police Captain Charlie Santiago, COP Carmen Police Station; at Hon. Gerard Martin Villamor, Vice Mayor Carmen.
Tampok sa naturang aktibidad ang pagtuturo sa mahigit 150 na mga kalahok sa paggawa ng mga produktong gawang bahay katulad ng detergents, fabric conditioner, at dishwashing liquid.
Layunin ng “Panginabuhian Alang sa Kababayen-an” na matugunan ang mga partikular na pangangailangan at hamon na kinakaharap ng kababaihan, gayundin upang mabigyan sila ng mahahalagang kasanayan, kaalaman, at pagpapaunlad ng sarili para sa pang araw-araw na pangangailangan.
