Binigyang katuparan ng Cagayan PNP sa ilalim ng kanilang Libreng Patubig Project ang pangarap ng mga residente ng Sitio Langay, Barangay Banguian, Abulug, Cagayan nito lamang Martes, Enero 31, 2023.
Pormal ng ipinagkaloob ng mga miyembro ng 2nd Cagayan Provincial Mobile Force Company sa pamamagitan ng isang simpleng programa ang isang poso sa pangangalaga ng mga residente sa nabanggit na Sitio.
Labis ang galak at pasasalamat ng mga benepisyaryo sa kapulisan dahil bagama’t liblib ang kanilang lugar ay pilit nila itong inabot upang maisakatuparan ang matagal na nilang hiling na magkaroon ng malapit na mapagkukunan ng tubig para sa pang araw-araw nilang pamumuhay.
Ayon kay Police Lieutenant Julius Viernes, Platoon Leader ng 1st Maneuver Force Company, isa lamang ito sa mga hakbang na ginagawa ng kapulisan upang maiparating ang tunay na serbisyo ng pamahalaan para sa mamamayan lalo na sa mga nasa malalayong lugar.
Pinasalamatan din niya ang mga Opisyales ng Barangay, Stakeholders, ibang ahensya ng gobyerno, at maging ang mga residente sa kanilang tulong upang maisakatuparan ang proyekto at hinikayat silang patuloy na makiisa at makipagtulungan sa pamahalaan para sa ikakabuti at ikakaunlad ng bayan.
Bahagi ang programa ng Project TULAY AKO (TUbig at iLaw Alay sa mamamaYan at Ayudang Kabuhayan Ora mosmo) na inisyatibo ng 2nd Cagayan PMFC sa ilalim ng pamumuno ni Police Lieutenant Colonel Wilhelmino S Saldivar Jr, Force Commander na naglalayong makatulong sa pamamagitan ng pagbibigay ng libreng patubig lalo na sa mga liblib na lugar bilang pagsuporta sa kampanya ng pamahalaan laban sa terorismo at insurhensiya sa bansa.
Source: 2nd Cagayan PMFC
Panulat ni Police Staff Sergeant Mary Joy D Reyes
