Naghandog ng pabahay ang pulisya ng Quirino Police Provincial Office (PPO) sa isang pamilyang nasunugan sa Sitio Apsi, Barangay San Dionisio II, Nagtipunan, Quirino nitong Enero 11, 2024.
Ayon kay Police Colonel Augosto Bayubay, Provincial Director ng Quirino PPO, ang benepisyaryo ay sina Ginoo at Ginang Fermin at Josephine Tundagui, residente ng nabanggit na lugar na kamakailan lang ay natupok ang kanilang munting tahanan.
Subalit sa kabila ng pagsubok na kanilang naranasan, abot langit ang kanilang saya at pasasalamat sa mga kapulisan ng Quirino nang simulang gawin ang isang magandang tahanan at ngayon ay matagumpay na naihandog sa mag-anak.
Sa mensahe ni Ginang Tundangui, ipinarating niya ang labis na pagpapahalaga at saludo sa mga miyembro ng Quirino PNP. Tinuturing din niya na mga bayani at champion sa kanilang mga puso ang mga kapulisan.
Maliban sa pabahay ay nakatanggap din ang benepisyaryo ng bigas at grocery packs.
Dumalo din sa aktibidad sina Honorable Noel T Lim, Company Advisory Group (CAG) at Lokal na Pamahalaan ng Nagtipunan.
Ang programa ng pulisya ay may kaugnayan sa EO 70 o National Task Force to End Local Communist Armed Conflict (NTF-ELCAC) na naglalayong maghatid ng mga pangunahing pangangailangan at serbisyo para sa mga kababayan nating nasa liblib na mga lugar sa tulong at suporta ng mga nagkawang-gawa at suporta ng mga stakeholders.
Source: Quirino PPO
