Parang, Maguindanao – Mariing kinondena ng Police Regional Office Bangsamoro Autonomous Region ang pagsabog ng IED na nangyari sa loob ng isang Rural Bus Tours na nagresulta sa pagkasugat ng apat na pasahero sa kahabaan ng National Highway sa Brgy. Making, Parang, Maguindanao, noong Abril 24, 2022.
Ayon kay Police Colonel Jibin Bongcayao, Provincial Director ng Maguindanao Police Provincial Office, 23 pasahero ang pababa na mula sa Gensan-Dipolog City bound Rural Bus Tours na may body no. 10738 sa Niño Eatery para mag-almusal nang sumabog ang IED sa loob ng likod na bahagi ng nasabing bus.
Agad namang siniguro, kinordon, at prinoseso ng PNP ang pinangyarihan ng krimen kung saan nadiskubre ang isa pang IED na matagumpay na na-neutralized ng Explosive Ordinance Disposal Team.
Samantala, agad namang dinala sa pinakamalapit na pagamutan ang apat na sugatang biktima, dalawa dito ang nakalabas na ng hospital habang ang dalawa pang biktima ay dinala sa Cotabato Regional and Medical Center at ngayon ay nasa stable na kondisyon na.
Ang ibang mga pasahero ay maayos na inilikas at na-secure ng PNP responding team.
Inatasan ni Police Brigadier General Arthur Cabalona, Regional Director, PRO BAR si PCol Jibin Bongcayao, na magsagawa ng masusing imbestigasyon kasama na ang pagsusuri sa mga CCTV para sa posibleng pagkakakilanlan ng nasa likod ng nasabing pagsabog ng IED.
Ang isang pasaherong bumaba sa Parang Terminal ilang daang metro bago ang lugar ng pagsabog ay itinuturing na ngayong Person of Interest.
Ang Cartographic Sketch ng nasabing POI ay ipinakalat na sa ibang mga yunit.
Dagdag pa, inatasan ng Regional Director ang lahat ng unit ng PNP na paigtingin ang kanilang mga hakbang sa seguridad lalo na sa mga pangunahing lansangan at terminal.
“Mahigpit naming kinokondena ang hindi makataong pagkilos na ito na nagdulot ng takot sa Parang, Maguindanao.”, saad ni PBGen Arthur Cabalona.
###
Panulat ni Patrolman Charlie Nasroden Corpuz
