Lanao Del Sur – Nauwi sa engkwento ang paghahain ng warrant of arrest sa isang kilalang miyembro ng Macaraya Criminal Group na sangkot sa pagpatay at pagnanakaw sa isinagawang ‘Oplan Pagtugis’ ng PNP sa Brgy. Tuka-Kialdan, Marantao, Lanao Del Sur nitong Hulyo 11, 2022.
Kinilala ni Police Brigadier General Arthur Cabalona, Regional Director ng Police Regional Office Bangsamoro Autonomous Region, ang suspek na si Jack Macaraya, residente ng Brgy. Tuka-Kialdan, Marantao, Lanao Del Sur, at wanted sa kasong Robbery with Homicide.
Ayon kay PBGen Cabalona, nang ihahain na ang Warrant of Arrest laban sa suspek ay bigla na lamang itong nagpaputok gamit ang kanyang Cal. 45 pistol na naging dahilan upang makipagpalitan ng putok ang mga operatiba ng Criminal Investigation and Detection Group Lanao del Sur PFU (lead unit), 13th SAC Special Action Force, Provincial Intelligence Unit Lanao Del Sur at Marantao Municipal Police Station.
Dagdag pa, nagtamo ng tama ng bala ang suspek at isinugod sa Amai Pakpak Hospital para sa agarang atensyong medikal ngunit idineklara itong dead on arrival ng attending physician.
Narekober sa pinangyarihan ng insidente ang isang yunit ng cal .45 pistol na may serial no. 785582; isang magazine; at dalawang cal .45 na bala.
Samantala, pinuri naman ni PBGen Cabalona, ang operating units sa kanilang accomplishment at ipinahayag na ang PRO BAR ay patuloy na magpapatupad ng batas sa pamamagitan ng pagpapaigting sa pagpapatupad ng Warrant of Arrest na inisyu ng korte at ang mga may standing warrant ay dapat harapin ang kanilang mga kaso.
###
Panulat ni Patrolman Charlie Nasroden Corpuz
