Catarman, Northern Samar – Inihatid na sa huling hantungan ang isa sa dalawang pulis na nasawi sa pag-atake ng teroristang grupong NPA, sa kanyang bayan sa San Isidro, Northern Samar nito lamang Biyernes, Abril 8, 2022.
Si Patrolman Harvie Lovino, Jr, ay miyembro ng Philippine National Police Class Alab-Diwa ng 2018-01.
Pinangunahan ni Acting Provincial Director ng Northern Samar Police Provincial Office, Police Colonel Alfredo Tadefa kasama ang iba pang mga tauhan ng PNP ang pagbibigay ng parangal para sa yumaong si Pat Lovino.
Binigyan si Pat Lovino ng 21-gun salute at bugle taps na isinagawa ng First Northern Samar Provincial Mobile Force Company at ng 8th Infantry Division ng Philippine Army.
Ibinigay din ang watawat ng Pilipinas sa kanyang asawang si Renalyn bilang parangal sa yumaong si Pat Lovino sa kanyang sukdulang sakripisyo at dedikasyon sa paglilingkod sa bayan.
Ito naman ang mensaheng iniwan ni PCol Tadefa, “Hindi malilimutan ang kanyang mga sakripisyo. Ito ang magsisilbing inspirasyon natin upang maging mas walang humpay sa ating kampanya laban sa insurhensiya hanggang sa makamit natin ang pangmatagalang kapayapaan na ating inaasam-asam.”
###
Panulat ni Patrolwoman Rialyn Valdez
