Pasay City — Bistado ang dalawang sales agent sa controlled delivery operation ng PNP Aviation Security Group dahil sa sana’y tatanggapin na package na naglalaman umano’y ng Php5,100,000 halaga ng shabu nitong hapon ng Huwebes, June 2, 2022.
Kinilala ni AvSeg Director, Police Brigadier General Andre Dizon, ang dalawang suspek na sina Bryan Vincent Pagayon (consignee), 43, sales agent sa Unit 3B G Victoria Valley Condominium 90F Subdivision, Don Celsus Tuazon Av. Brgy Dela Paz, Antipolo, Rizal at Lot4 B5 Green Acres Subd., Brgy San Isidro, Cainta, Rizal; at Ferdinand E Jimenez, 64 at residente ng 131 Lope K Santos St., Brgy. Pedro Cruz, San Juan City.
Ayon kay PBGen Dizon, naaresto ang dalawa bandang 5:45 PM sa Central Mail Exchange Center (CMEC) Domestic Road, Pasay City sa pinagsanib pwersa ng AVSEU NCR at NAIA IADITG.
Ang nasabing package na pinaghihinalaang may laman na droga ay pinadala ng nagngangalang Juan Miguel Jacoo Erenia ng Av Pedro Loyola #220 DTP 10 Frace Acapulco Ensenada Baja California, Mexico.
Narekober sa loob ng parcel ang isang kahon na may duct tape; isang kahon na may label na JAZZ DRUM; anim na cling wrap na may tape na naglalaman ng humigit-kumulang 750 gramo ng brownish substance, mga kendi at drum set; isang notice card; isang photocopy ng Brgy. Certificate kalakip ang mga ID with signature; at dalawang residence IDs.
Sinampahan na ng pulisya sina Pagayon at Jimenez sa kasong paglabag sa Republic Act 9165 o Comprehensive Dangerous Drugs Act of 2002.
Binalaan naman ni PBGen Dizon ang sinumang nagpaplano ng ganitong scheme na kahit anong tago nila sa pagtutulak ng ilegal na droga, hindi pa rin ito makaaalpas sa pulisya dahil kanilang tinitiyak na maneuneutralize nila ang mga ito papasok o palabas pa lang ng bansa.
Source: PNP-AVSEG
###
Panulat ni PCpl Jhoanna Marie Najera Delos-Santos
