Patay ang isang mataas na opisyal ng Land Transportation Office (LTO) matapos pagbabarilin sa kanyang sasakyan sa Quezon City nito lamang Biyernes, Mayo 24, 2024.
Kinilala ni PBGen Redrico A Maranan, Quezon City District Director, ang biktima na si Mercedita Gutierrez, Chief of the LTO Central Office’s Registration Section.
Ayon sa ulat ng QCPD, huminto sa tabi ng sasakyan ng biktima ang hindi pa nakikilalang salarin na sakay ng motorsiklo at nagpaputok sa bintana ng driver kung saan sumalpok ito sa kaharap na truck sa kanto ng K-H Street malapit sa Kamias Road, Barangay Pinyahan sa Quezon City bandang alas-6:20 ng gabi.
Agad namang rumesponde ang PNP Scene of the Crime Operative (SOCO) upang inspeksyonin at mangalap ng mga ebidensya sa sasakyan ng babaeng biktima.
“Ang biktima, na nagtamo ng mga sugat, ay agad na dinala sa East Avenue Medical Center para gamutin ngunit idineklara itong patay ng dumating na manggagamot,” saad ng QCPD.
Tiniyak naman ni PBGen Maranan na bubuo sila ng kanyang mga tauhan ng Special Investigation Task Group, SITG “Gutierrez,” para imbestigahan ang kaso upang mapabilis ang pag-iimbestiga sa pagpaslang sa biktima at upang makamit ang hustisya ng kanyang pagkamatay.
