Sa paggunita ng Undas 2024, tinitiyak ng Nueva Ecija Police Provincial Office ang kaligtasan at seguridad ng mga residente at bisitang magdiriwang ng Undas sa buong probinsya ng Nueva Ecija mula Oktubre 29 hanggang Nobyembre 4, 2024.
Pinangunahan ni Police Colonel Ferdinand D. Germino, Acting Provincial Director ng Nueva Ecija Police Provincial Office, ang deployment ng kapulisan sa buong probinsya, maging ang inspeksyon ng paghahanda sa mga Police Assistance Desk na matatagpuan sa mga sementeryo, memorial park, at mga terminal ng transportasyon upang masiguro ang kakayahan ng mga tauhan na magbigay ng mabilisang tugon sa anumang insidente.
Bukod dito, aktibong nagsagawa ng mga pag-inspeksyon ang mga red team mula sa Police Provincial Office, upang tiyaking maayos ang deployment ng mga pulis.
Ang mga strategic checkpoints naman ay inihahanda rin para sa posibleng paggamit sa mga dragnet operation.
Kasama rin sa pagtitiyak ng seguridad ang mga force multipliers gaya ng mga yunit mula sa local government at mga volunteers mula sa komunidad upang mas palakasin ang puwersa ng seguridad.
“Bilang paghahanda sa taunang paggunita, hinihikayat ko ang bawat isa na magtulungan upang lumikha ng isang ligtas na kapaligiran para sa lahat. Igalang natin ang ating mga yumaong mahal sa buhay nang may pag-alaala at kasiguraduhan sa kaligtasan. Sama-sama nating gawing payapa at ligtas ang okasyong ito para sa lahat,” ani PCol Germino.
Panulat ni Pat Jilly Peña
