Sa pinaigting na kampanya ng Police Regional Office 2 laban sa wanted person, nakorner ng mga kapulisan ang isang notoryus na lalaki na may patong patong na kaso sa Taguig City, Metro Manila nito lamang ika-23 ng Mayo 2024.
Nagsagawa ng operasyon ang pinagsamang pwersa ng mga awtoridad na nagresulta sa pagkakadakip ng suspek na kinilalang si alyas “Jim”, miyembro ng Potential Private Armed Group (PPAG-Alipio Group), 37 taong gulang, at residente ng Barangay Fula, Buguey, Cagayan.
Kaugnay nito, ang suspek ay nahaharap sa kasong Murder, paglabag sa Republic Act 10591 o “Comprehensive Firearms and Ammunition Regulation Act”, at paglabag sa Batas Pambansa 881 o “Omnibus Election Code”.
Samantala, labis naman na ikinatuwa ni Police Brigadier General Christopher C Birung, Regional Director ang matagumpay na pagkakahuli ng nabanggit na suspek at pinuri ang mga kapulisang nasa likod nito, “Patuloy ang buong pwersa ng The Gallant Valley Cops sa pagsasagawa ng mga operasyon upang tuluyan nang mahuli ang mga wanted person dito sa ating rehiyon.”
Source : Police Regional Office 2
Panulat ni Pat Wendy G Rumbaoa
