Cebu City – Kalaboso ang isang notorious na gun-for-hire sa inilunsad na buy-bust operation ng City Intelligence Unit at City Drug Enforcement Unit ng Cebu City Police Office bandang 10:20 ng gabi sa Belgium St., Brgy. Suba, Cebu City, noong Mayo 27, 2023.
Kinilala ni Police Colonel Ireneo Dalogdog, City Director ng Cebu City Police Office, ang naaresto na si “Bryan”, 35, residente ng Sitio Lawis, Brgy. Pasil, Cebu City.
Nakumpiska mula sa pag-iingat ng suspek ang tinatayang nasa 55 gramo ng hinihinalang shabu na umaabot ang halaga sa Php374,000, dalawang unit .45 pistol, black sling bag, isang unit ng Rusi Motorcycle at buy-bust money.
Ang mga nakalap na ebidensya ay dinala sa PNP Forensic Unit para sa pagsusuri.
Ayon kay PCol Dalogdog, ang naaresto ay suspek sa serye ng shooting incident sa lungsod.
Hindi naman itinanggi ng suspek ang mga akusasyon laban sa kanya.
Pinuri ni PCol Dalogdog ang mga tauhan ng CIU at CDEU sa kanilang accomplishment hindi lamang sa ilegal na droga kundi sa pagresolba sa serye ng insidente ng pamamaril sa Cebu City. Idinagdag niya na ang nasabing accomplishment ay bahagi ng pinaigting na pagsisikap ng CCPO para mabawasan ang insidente ng pamamaril sa Cebu City na “Operation Run After Perpetrators” (ORAP).
