Arestado sa ikinasang joint police operation ng Muntinlupa City Police Station ang tinaguriang No. 6 Most Wanted Person sa Station Level para sa mga kasong may kinalaman sa ilegal na droga sa kahabaan ng Quijano Street, Barangay San Juan, San Ildefonso, Bulacan nito lamang Linggo, Pebrero 9, 2025.
Kinilala ni Police Colonel Robert C Domingo, Chief of Police ng Muntinlupa CPS, ang nadakip na suspek na si alyas “Tan,” 40-anyos, lalaki, at isang construction worker.
Pinangunahan ng Intelligence Section ng Muntinlupa CPS ang operasyon katuwang ang mga tauhan ng Intelligence and Investigation Unit ng San Ildefonso Municipal Police Station.
Isinilbi kay alyas “Tan” ang Warrant of Arrest dahil sa paglabag sa Section 11, Article II ng Republic Act 9165 (Possession of Dangerous Drugs) na may inirekomendang piyansa na nagkakahalaga ng Php200,000.
Pinuri naman ni Police Brigadier General Manuel J. Abrugena Jr., District Director ng Southern Police District, ang Muntinlupa City PNP para sa kanilang hindi natitinag na pangako sa pagsubaybay sa mga pugante at pagtataguyod ng mga panuntunan ng batas. “Ang pag-aresto na ito ay isang patunay ng aming patuloy at pinaigting na pagsisikap sa pagtugis sa mga indibidwal na sangkot sa mga aktibidad ng ilegal na droga. Kami ay mananatiling nakatuon sa aming misyon na pananagutin sa batas ang mga mahuhuling kriminal at titiyakin ang mas ligtas na komunidad para sa publiko.”
Source: SPD PIO
