Umarangkada ang programang “Ngiting Handog ng Viga Kasurog Cops” sa pamamahagi ng school supplies sa mga kabataang mag-aaral ng Sagrada Elementary School nitong ika-8 ng Nobyembre 2024.
Ito ay pinangunahan ng Viga MPS sa pamumuno ni Police Captain Mark Anthony M Velasco, Officer-In-Charge, katuwang ang RPSB Team na pinangunahan ni PCMS Warren M Obal mula sa Catanduanes 2nd Provincial Mobile Force Company (PMFC).
Ang aktibidad ay bahagi ng Project P.E.A.C.E (Promoting and Ending Abuses Against Children Everywhere) ng Viga MPS, na isang best practice program na naglalayong magbigay ng mga konkretong tulong sa komunidad, lalo na sa mga kabataan, upang matulungan silang magtagumpay sa kanilang mga pag-aaral.
Ang lokal na pamahalaan ng Viga, sa pamumuno ni Hon. Emetrio M. Tarin, ay malugod na tumulong upang maisakatuparan ang layuning ito. Sa pamamagitan ng kanilang tulong, naipadama ang taos-pusong serbisyo ng mga kapulisan, hindi lamang sa aspeto ng pagbibigay ng seguridad, kundi pati na rin sa mga aktibidad na makikinabang ang mga kabataan at komunidad.
Bilang bahagi ng programang ito, nagsagawa din ng isang makabuluhang panayam ang mga tauhan mula sa Women and Children Protection Desk (WCPD) ng Viga MPS. Tinalakay nila ang mahalagang paksa ng “Good Touch and Bad Touch” na layong magbigay-aral at gabay sa mga kabataan kung paano makaiwas sa anumang uri ng pang-aabuso.
Sa pamamagitan ng programang ito, mas pinatibay ang relasyon ng kapulisan at komunidad, na naglalayong maghatid ng malasakit at suporta sa mga kabataan ng Viga, Catanduanes. Ang mga inisyatiba tulad ng Project P.E.A.C.E ay nagpapakita ng komprehensibong serbisyo ng kapulisan na higit pa sa pagbibigay ng seguridad, kundi pati na rin sa pagpapalaganap ng edukasyon at proteksyon para sa mga kabataan.
Source: Viga Mps Catanduanes Ppo
Panulat ni PCpl Doxie Charesse C Casasos
