Arestado ang isang Most Wanted Person sa kasong Rape sa patuloy na isinagawang Manhunt Charlie Operation ng Tracker team ng Gingoog City Police Station at Criminal Investigation and Detection Group Misamis Oriental Provincial Field Unit sa Barangay 22-A, Gingoog City, Misamis Oriental nito lamang Hulyo 2, 2024.
Kinilala ni Police Brigadier General Ricardo G Layug Jr., Regional Director ng Police Regional Office 10, si alyas “Jerson”, 30 anyos, kolektor ng pera sa Gingoog City, Misamis Oriental.
Batay sa ulat ng 16-anyos na biktima, hipag ng suspek na di umano’y ginahasa sa dalawang magkahiwalay na insidente ngayong taon.
Naganap ang mga insidente habang ang biktima ay nasa tirahan ng suspek at nag-aalaga sa kanyang pamangkin.
Naaresto ang suspek sa bisa ng Warrant of Arrest sa kasong Rape o paglabag sa Republic Act 7610 (2 counts) na walang inirekomendang piyansa.
Pinuri ni PBGen Layug Jr., ang mga operating units para sa matagumpay na operasyon. Pinaalalahanan din niya ang publiko, lalo na ang mga sexual offenders, na hindi titigil ang PRO10 hangga’t hindi sila nakukulong.
Hinikayat din niya ang publiko na maging mulat sa kanilang paligid at ipagbigay-alam sa awtoridad kung sakaling sila ay biktima ng sexual assault.
Ang pagkakadakip sa suspek ay bunga ng magandang pagtutulungan at tiwala ng mamamayan at kapulisan na sugpuin ang kriminalidad sa rehiyon 10.
