Camp Crame, Quezon City – Pumirma ng Memorandum of Agreement ang PNP at PSSLAI nito lamang Lunes, Oktubre 24, 2022, sa Camp Crame, Quezon City na nagsilbing hudyat ng pagtutulungan ng mga ito para sa pagtayo ng bagong Tabuk City Police Station na tiyak na makakatulong upang mas mapabilis at mas mapagtibay ang serbisyo publiko ng Tabuk Pulis.
Kasabay nito ang Traditional Flag Raising Ceremony, kung saan isinagawa rin ang Unveiling of Scale Model at Ground Breaking Ceremony for the Construction of New Tabuk CPS, maging ang pagkilala sa mga natatanging personalidad na nagpakita ng husay sa pagganap sa kanilang sinumpaang tungkulin.
Naging panauhing pandangal naman ang Chairman and CEO ng PSSLAI, Atty. Lucas M. Managuelod, na kung saan buong puso niyang ipinahayag ang kanilang suporta sa PNP at kanya rin sinigurado na ang proyektong ito ay simula lamang ng mas marami pang proyekto na kanilang pagsasamahan at pagtutulungan upang mas lalong mapaganda ang serbisyong ibinibigay ng kapulisan sa mga mamamayan.
Ipinahayag naman ng Hepe ng Pambansang Pulisya, PGen, Rodolfo Azurin Jr., ang kanyang taos pusong pasasalamat sa PSSLAI at sa lahat ng taong nasa likod ng aktibidad na tumulong at nakiisa upang maisakatuparan ang nasabing proyekto.
Ang pakikipagtulungan ng PSSLAI sa Philippine National Police ay isang magandang manipestasyon ng mas malaki at malawak na pwersa na makakatulong sa pagbibigay ng serbisyo publiko na nagtataglay ng malasakit at pagmamahal upang makamit ang iisang mithiin na kaunlaran ng pamayanan.
