M’lang – Naaresto ang isang local terrorist group member matapos ang isinagawang operasyon ng kapulisan sa bahagi ng Purok 6, Sitio Maulad, Brgy. Dungo-an, M’lang, Cotabato nito lamang Nobyembre 27, 2022.
Ayon kay PBGen Jimili Macaraeg, Regional Director ng PRO 12, ang pinagsamang grupo ng kapulisan at kasundaluhan ay maghahain sana ng Warrant of Arrest para sa dalawang suspek na sina Omal Owa at Dadao Kamsa dahil kasong destructive arson.
Pagdating ng grupo sa nasabing lugar ay dito na pinaputukan ang operating team gamit ang hindi pa malamang kalibre ng baril na nagresulta sa palitan ng putok.
Bandang 10:00 ng umaga, isa sa mga kasamahan ng akusado na kinilalang si Al Amer Ulangkaya Camen alyas “Paoto Camen” ay nahuli dahil sa pagmamay-ari ng hinihinalang Improvised Explosive Devise (IED).
Lumalabas sa karagdagang imbestigasyon na ang suspek ay kaanib sa Dawlah Islamiyah-Hassan Group, isang Local Terrorist Group na kumikilos sa rehiyon.
Dinala ang naarestong suspek sa M’lang MPS para sa dokumentasyon habang ang narekober na hinihinalang IED ay itinurn-over sa North Cotabato EOD at Canine Unit para sa Technical Evaluation Report at tamang disposisyon.
“Ang aming pangako na tiyakin ang kapayapaan at pagkakaisa sa SOCCSKSARGEN ang siyang nagpapanatili sa aming pang-araw-araw na pakikipaglaban sa kawalan ng batas. Kaya, hindi natin hahayaang maging pugad ng mga kriminal ang ating minamahal na rehiyon,” ani PBGen Macaraeg.
Panulat ni Patrolman Gio Batungbacal
