Boluntaryong sumuko ang isang dating miyembro ng KLG Marco, Leonardo Pacsi Command/KLG AMPIS sa tanggapan ng Natonin Municipal Police Station, Poblacion, Natonin, Mountain Province nito lamang ika-11 ng Mayo 2024.
Kinilala ni Police Colonel Sibley P Dawiguey Jr., Provincial Director ng Mountain Province Police Provincial Office, ang sumuko na isang 40 anyos, may asawa, tubo ng Tinglayan, Kalinga at kasalukuyang residente ng Natonin, Mountain Province.
Kasabay sa kanyang pagtalikod sa teroristang grupo ay ang pagsuko rin ng kanyang mga armas na isang homemade shotgun, isang RG, isang trip flare, at isang subversive document.
Ayon kay Police Colonel Sibley P Dawiguey Jr., ang nasabing pagbabalik-loob ng dating NPA ay bunga ng pagsisikap ng mga kapulisan sa pangunguna ng mga operatiba ng Natonin Municipal Police Station, 1st at 2nd Mountain Province Provincial Mobile Force Company, Provincial Intelligence Unit/ Drug Enforcement Unit, katuwang ang Paracelis Municipal Police Station, Regional Intelligence Division-PRO Cordillera at iba pang mga ahensya ng pamahalaan sa pagpapaigting sa Executive Order 70-National Task to End Local Communist Armed Conflict.
Patuloy na nananawagan si PCol Dawiguey Jr sa mga natitirang miyembro ng teroristang grupo na magbalik-loob na sa pamahalaan at mamuhay ng matiwasay kasama ang kanilang pamilya tungo sa mas mapayapang bagong Pilipinas.
Panulat ni Pat Melanie Amoyong
