Boluntaryong nagbalik-loob sa pamahalaan ang isang miyembro ng Communist Terrorist Group at kusang isinuko ang kanyang mga armas sa Barangay Cagang, Barcelona, Sorsogon nito lamang Biyernes, ika-27 ng Hulyo 2024.
Kinilala ang nagbalik-loob na rebelde na si alyas “Kier”, 27 taong gulang, isang magsasaka at aktibong miyembro ng CTG na nakatalaga sa Southern Regional Youth Group (SRYG).
Ang pagsuko nito ay resulta ng isang matagumpay na intelligence-driven operation na isinagawa ng composite team mula sa Regional Intelligence Division 5 – Regional Special Operations Unit (RID5-RSOU), Barcelona MPS, 504th MCRMFB5, 92nd Special Action Company ng 9th Special Action Battalion, PNP SAF, 2nd PMFC, at sinuportahan ng 22nd Infantry Battalion ng Philippine Army.
Kasama sa kanyang isinuko ang isang (1) unit ng kalibre .45 na pistol na may bala, 7.62mm belted ammunition, isang (1) Improvised Explosive Device (IED), isang (1) MK2 HE hand grenade, blasting cap, at mga electrical wires.
Ang sumukong rebelde ay kasalukuyang nasa kustodiya ng Barcelona MPS para sa karagdagang proseso ng Enhanced Comprehensive Local Integration Program (E-CLIP), na naglalayong bigyan ng bagong pag-asa at pagkakataon ang mga dating rebelde na magbagong buhay.
Ang pagsuko ng miyembro ng CTG ay isang patunay ng patuloy na tagumpay ng mga programa at operasyon ng pamahalaan laban sa terorismo at insurhensiya.
Patuloy na hinihikayat ng pulisya ang iba pang miyembro ng CTG na isuko na rin ang kanilang mga armas at magbalik-loob sa pamahalaan upang makamit ang tunay na kapayapaan at kaunlaran sa isang Bagong Pilipinas.
Source: Sorsogon PPO
Panulat ni Pat Rodel Grecia
