San Juan, Batangas – Nakumpiska ang ilang mga pampasabog at baril sa Sitio Marecacawan, Brgy. Quipot, San Juan, Batangas sa operasyon ng PNP, AFP at PN nito lamang Sabado, Hulyo 16, 2022.
Kinilala ni Police Colonel Glicerio Cansilao, Provincial Director ng Batangas Police Provincial Office, ang naarestong suspek na si Jay R Urmenita Bas, 37, residente ng naturang barangay.
Ayon kay PCol Cansilao, bandang 10:20 ng umaga naaresto ang suspek sa naturang barangay sa isinagawang Search Warrant operation ng pinagsanib na puwersa ng Provincial Intelligence Unit-Batangas, Drug Enforcement Unit, Batangas Provincial Mobile Force Company/Special Weapon and Tactics, 403rd Army Material Command , Regional Mobile Force Battalion 4A, Regional Intelligence Division 4A-Regional Intelligence Team Batangas, Regional Intelligence Unit4A, Naval Security Group Southern Luzon at ng San Juan Municipal Police.
Nakumpiska sa bahay ng suspek ang isang Caliber 5.56 rifle Colt, Caliber 9mm pistol, Cal 9mm Jericho, Armscor Cal. 40 pistol at mga magazine, mga samut-saring bala ng baril at mga pampasabog tulad ng rifle grenade, dalawang hand grenade, at iba pang mga kagamitan.
Ang naturang suspek ay miyembro ng Eleazar Rocio Criminal Group, na aktibo bilang gun-for-hire group at nag-ooperate ng mga ilegal na pasugalan sa munisipalidad.
Nahaharap ang suspek sa kasong paglabag sa Sec 3 ng Republic Act 9516 o Act of Illegal/Unlawful Possession, Manufacture, Dealing in, Acquisition or Disposition of Firearms, Ammunition or Explosives.
Ang tagumpay ng operasyon ng mga ahensya ng gobyerno ay bunga ng pinaigting at suporta ng mamamayan upang mapanatiling ligtas at maayos ang komunidad
Source: Batangas Police Provincial Office-PIO
###
Panulat ni Police Executive Master Sergeant Cabugon
