Lanao del Sur – Narekober ng Kapatagan Municipal Police Station sa isinagawang joint operation ang mga inabandonang ilegal na troso sa Brgy. Daguan, Kapatagan, Lanao Del Sur nito lamang ika-4 ng Enero 2023.
Ito ay pinangunahan ni Police Lieutenant Chervil Ferenal, Acting Chief of Police ng Kapatagan MPS, katuwang ang Marine Battalion Landing Team-2 sa pamumuno ni 1Lt Norberto Peria Jr. PN (M).
Ayon kay PLt Ferenal, isinagawa ang operasyon dahil sa mga namataang armadong kalalakihan sa political boundary ng Kapatagan, Balabagan, at Maragong, Lanao del Sur at pagdating sa lugar ay dito na natuklasan ang mga inabandonang ilegal na troso na humigit-kumulang 1,000 board feet na may tinatayang market value na Php30,000.
Ang mga nakumpiskang ilegal na troso ay pansamantalang dinala sa Kapatagan MPS para sa dokumentasyon at dadalhin sa PENRO Lanao del Sur para sa kaukulang disposisyon.
Samantala, ang Pambansang Pulisya ng Pilipinas ay patuloy na magsasagawa ng pagpapatrolya upang mapanatili ang katahimikan at kapayapaan sa ating komunidad.
Panulat ni Patrolman Charlie Nasroden Corpuz
