Nakumpiska ng mga operatiba ng Police Regional Office 10 ang mga baril, bala at shabu sa ikinasang search warrant operation kay alyas “Hamza” sa National Highway, Purok 3 Barangay Dableston, Sultan Naga, Dimaporo, Lanao del Norte nito lamang ika-6 ng Oktubre 2024.
Ayon kay Police Brigadier General Jaysen C De Guzman, Acting Regional Director ng PRO 10, naging matagumpay ang operasyon dahil sa pagsisikap ng mga tauhan ng Sultan Naga Dimaporo Municipal Police Station katuwang ang Lanao del Norte Police Provincial Office, 5th Special Operation Unit Maritime Group at Regional Intelligence Unit 10 bagamat nakatakas ang suspek na si “Hamza”.
Nakumpiska sa naturang operasyon ang 10 pakete ng hinihinalang shabu na may Standard Drug Price na Php8,160, mga drug paraphernalia; isang kalibre ng Ingram na walang serial number at 18 na mga bala; isang kalibre 45 Colt na may serial number na 849125 at anim na bala; isang kalibre Colt Combat Commander na may serial number na 784235 at dalawang bala; at isang kalibre 45 STI grandmaster na may serial number na 824195 at limang balang kalakip nito; 10 na bala ng shotgun at 10 bala ng 5.56 caliber rifle.
“Patuloy ang kapulisan ng PRO10 na magsusumikap upang masupil ang mga ilegal na gawain lalong lalo na ang mga operasyon ng ilegal na droga at ilegal na armas. Hinihikayat po namin ang lahat sa inyong patuloy na suporta at pakikipagtulungan upang mas mapabilis ang pag-abot ng hustisya para sa lahat,” pahayag ni PBGen De Guzman.
