Boluntaryong isinuko ng nasa walong indibidwal mula sa iba’t ibang barangay sa Negros Oriental ang ilang matataas na kalibre ng baril at pampasabog sa mga miyembro ng 704th Maneuver Company ng Regional Mobile Force Battalion (RMFB) 7 nito lamang Linggo, Oktubre 23, 2022.
Kabilang sa mga isinuko sa mga otoridad ang isang M16 Rifle, isang short at long magazine na loaded nang live ammunitions, dalawang shotgun na loaded nang 10 pirasong live ammunitions, isang Calibre .38 revolver, dalawang Calibre 22 na may pitong piraso ng live ammunition at dalawang hand grenade.
Ang naturang pagsuko ay resulta ng maayos at matagumpay na kampanya ng grupo sa loose firearms sa naturang lalawigan at bahagi ng kanilang patuloy na pagsasagawa ng Simultaneous Joint Minor and Major Combat Operation.
Sa pangunguna ni Police Captain Ranie Solomon Bantolio, Company Commander ng 704th MC, RMFB 7, siniguro ng grupo na kanilang pag-ibayuhin ang pagpapatupad ng kanilang mga tungkulin hinggil sa anumang uri ng krimen at sa pagpigil nito para sa kaligtasan ng mamamayan at sa kaayusan at kapayapaan ng lipunan.
