Nadakip ng mga awtoridad ang isang 17-anyos na menor de edad matapos itong maaktuhang may dalang hinihinalang shabu sa isinagawang police operation sa Sitio Kahuyan, Barangay Mambaling, Cebu City noong ika-15 ng Hunyo 2025.
Kinilala ni Police Major Michael John M. Arandia, Station Commander ng Police Station 11, Cebu City Police Office, ang suspek na si Marniel, 17-anyos, Grade 9 student, at residente ng nasabing lugar.
Bandang 11:20 ng gabi nang ikasa ng Station Drug Enforcement Unit ng Police Station 11 ang nasabing operasyon bilang bahagi ng OPLAN BULABOG laban sa lahat ng uri ng ilegal na aktibidad sa kanilang nasasakupan.
Naaktuhan umano ang suspek na nasa aktong pagdadala ng mga ilegal na droga na naging sanhi ng kanyang agarang pagkakaaresto.
Nakumpiska mula sa kanya ang pitong (7) maliliit na heat-sealed plastic sachet at isang (1) malaking heat-sealed plastic pack na naglalaman ng hinihinalang shabu at tatlong (3) pirasong tig-iisang daang pisong papel na pinaniniwalaang kita mula sa ilegal na droga.
Ayon sa mga awtoridad, ang mga nakumpiskang droga ay tinatayang may kabuuang timbang na 25 gramo at may Standard Drug Price na Php170,000.
Patuloy ang pinaigting na kampanya ng mga kapulisan laban sa ilegal na droga, bilang bahagi ng adbokasiya ng pamahalaan tungo sa mapayapa at maayos na Bagong Pilipinas.
