Cotabato – Kasalukuyang nasa kustodiya ng Women and Children Protection Desk ng Midsayap PNP ang isang menor de edad matapos na makuhanan ito ng baril sa PNP-AFP checkpoint sa Poblacion 7, Midsayap, Cotabato nito lamang ika-20 ng Enero 2023.
Ayon kay Police Lieutenant Colonel Rolly Oranza, Hepe ng Midsayap Municipal Police Station, pinara ng mga kapulisan sa checkpoint ang suspek habang minamaneho ang kanyang motorsiklo (Kawasaki Bajaj Black side car (Payong-Payong) dakong 8:47 ng gabi.
Habang hinanapan umano ng driver’s license at dokumento ng motorsiklo ang suspek ay napansin ng mga otoridad ang nakaumbok at matigas sa kanyang kanang baywang.
At ng itaas ang damit ng menor de edad ay dito na napag-alaman ng mga kapulisan na ito ay kalibre 45 na baril na may kasamang magazine at bala.
Walang naipakitang mga papeles ang suspek sa dala nitong baril kaya agad itong kinumpiska at inaresto ng mga kapulisan.
Matapos ipahayag ng mga otoridad ang karapatang konstitusyon ng suspek ay agad itong dinala sa pinakamalapit na ospital para sa physical at medical examination at pagkatapos ay pormal na tinurn-over sa Women and Children Protection Desk ng nasabing himpilan.
Nahaharap ngayon ang suspek sa kasong paglabag sa RA 10591 o Comprehensive Firearms and Ammunition Regulation Act.
Alinsunod sa programa ng Pambansang Pulisya na MKK=K, tinitiyak ng PRO 12 na patuloy ito sa pagsasagawa ng checkpoint sa kanilang mga nasasakupan para mas masiguro ang kaligtasan ng komunidad laban sa anumang uri ng krimen.
Panulat ni Patrolman Khnerwin Jay A Medelin
