Matagumpay na inilunsad ng Occidental Mindoro Police Provincial Office ang sarili nitong Media Action Center (MAC) kasabay ng aktibasyon ng PNP National Media Action Center sa PNP Command Center, Camp Crame, na pinangunahan ni Chief PNP, PGen Rommel Francisco D Marbil nitong ika-7 ng Mayo 2025.
Ang Occidental Mindoro Media Action Center ay aktibo nang nakatutok sa Occidental Mindoro Provincial Election Monitoring Action Center (PEMAC) upang masiguro ang maayos na daloy ng balita sa tulong ng iba’t ibang media outlets sa probinsya, lalo na sa mga lugar na itinuturing na election areas of concern.
Ang Media Action Center ay magsisilbing sentro ng impormasyon para sa mga mamamahayag na nangangailangan ng kumpirmadong detalye kaugnay ng seguridad at kaganapan sa probinsya tuwing halalan.
Ayon kay PCol Timoteo L Espiritu, Jr, Provincial Director ng Occidental Mindoro, na sa pamamagitan ng tamang impormasyon, maagap na koordinasyon, at bukas na pakikipagtulungan sa lahat ng sektor—lalo na sa mamamayan at sa media—ay masisiguro natin ang isang maayos, mapayapa, at ligtas na halalan dito sa Occidental Mindoro.
Kaisa ang bawat kapulisan sa lalawigan sa pagtupad ng tungkulin para sa kapakanan at seguridad ng bawat Mindoreño ngayong eleksyon.
Layunin ng inisyatibong ito na tiyakin ang real-time monitoring ng deployment ng mga pulis sa buong probinsya ng Occidental Mindoro, at palakasin ang koordinasyon ng PPO at ng media bago, habang isinasagawa, at matapos ang araw ng halalan.
Bilang bahagi ng direktiba mula sa pambansang pamunuan, agad ding inatasan ang lahat ng Provincial Public Information Offices na i-activate ang kanilang lokal na Media Action Centers upang magsumite ng araw-araw na updates at ulat sa national MAC.
Ang hakbang na ito ay para sa mas maayos at sabayang pagpapalaganap ng tama at napapanahong impormasyon hinggil sa halalan.
