Negros Oriental – Matapos ang halos walong (8) minutong putukan sa pagitan ng mga miyembro ng 704th at 705th Maneuver Company (MC), Regional Mobile Force Battalion (RMFB) 7, 61st at 62nd Special Action Company (SAC), Special Action Force (SAF) at ilang miyembro ng Communist Terrorist Group noong Linggo, Pebrero 5, 2023 sa Negros Oriental ay nasamsam mula sa lugar ng insidente ang ilang matataas na kalibre ng baril at mga kagamitan na naiwan ng mga miyembro ng teroristang grupo.
Ayon sa Company Commander 705th MC, Police Lieutenant Donicko Bagtas Angeles, nangyari ang insidente nang nagsasagawa ng major combat operation ang mga awtoridad sa Sitio Bukal-Bukal, Brgy. Talalak, Sta. Catalina at Sitio Tubod Bagtik, Brgy. Enrique Villanueva, Sibulan ng naturang probinsya.
Ayon naman kay Police Captain Jade Basingao, Company Commander ng 704th MC, tinatayang nasa mahigit 15 miyembro ng komunistang grupo ang kanilang nakasagupa.
Wala namang naitalang nasaktan sa panig ng pamahalaan habang hindi matukoy kung ilan sa panig ng kalaban.
Nakumpiska mula sa lugar ng engkwentro ang nasa tatlong (3) high-powered firearms, isang (1) unit ng KG9 sub machine gun, 32 live ammunition, isang (1) unit ng M79 grenade launcher na may isang (1) round ammunition ng M203, isang (1) unit ng Glock Pistol 9mm na may laman na isang magazine na kargado ng 13 live ammunition.
Bukod pa dito, ay nasamsam din sa itinuturing na kuta ng grupo ang mga food supplies na nakapaloob sa isang bag kabilang na ang bigas, noodles, seasonings atbp.
Kaugnay ng naturang pangyayari, tiniyak ng grupo sa panig ng pamahalaan na hindi sila titigil at lalong paghuhusayin ang bawat hakbang upang wakasan ang insurhensya sa rehiyon at matiyak ang kaayusan at kapayapaan ng komunidad.
