Natuklasan ng pinagsamang pwersa ng mga operatiba ng PNP Criminal Investigation and Detection Group – Anti-Transnational Crime Unit, (CIDG-ATCU) Bureau of Customs (BOC) at Philippine Coast Guard (PCG), ang massive hoarding of imported onion at garlic na nagkakahalaga ng mahigit Php135,000,000 nito lamang Pebrero 17, 2023.
Ayon kay CIDG Director Police Brigadier General Romeo Caramat Jr., nasa 40 hanggang 50 tonelada ng imported na sibuyas at bawang na nagkakahalaga ng Php 40 milyon ang nasabat mula sa 18 bodega sa kahabaan ng Carmen Planas St. at tatlong bodega sa kahabaan ng Sto. Cristo St., kapwa sa Tondo, Maynila, isang bodega sa Binondo, Maynila, at isa pa sa Balut, Tondo, Maynila.
Samantala, tinatayang nasa 250 tonelada ng imported na sibuyas at bawang na nagkakahalaga ng humigit kumulang Php 95 milyon ang nakumpiska sa isang bodega sa Gov. Pascual Ave., Brgy. Catmon, Malabon City.
“Isinagawa ang operasyon bilang tugon sa maraming ulat ng ilegal na pag-aangkat at pag-iimbak ng mga agri-product, partikular na ang mga lokal na sibuyas, at bawang”, ani PBGen Caramat.
Ang mga nakumpiskang kalakal ay selyado at naka-padlock, habang ang mga pagsisiyasat ay nagpapatuloy upang matukoy ang mga indibidwal na sangkot sa diumano’y mga ilegal na aktibidad at magsampa ng naaangkop na mga kasong kriminal.
Hinihikayat ng mga awtoridad ang publiko na iulat ang anumang ilegal na aktibidad na may kaugnayan sa pag-aangkat, pag-iimbak, at pamamahagi ng mga agri-product upang matulungan sila sa kanilang pagsisikap na mapanatili ang isang patas at naaayon sa batas na pamilihan para sa mga mahahalagang kalakal.
