Upang matugunan ang mga hamon sa paghahatid ng serbisyo at mga impormasyon sa publiko, mas pinalakas ng ating hanay ang iba’t ibang multi-media program sa pamamagitan ng paglagda sa isang Memorandum of Agreement sa pagitan ng Philippine National Police at ng UNTV.
Bahagi nito ang mas pinalakas na Pulis @ Ur Serbis Reloaded, programa natin sa telebisyon na napapanood araw-araw mula 12:30 hanggang 2:00 ng hapon sa UNTV News and Rescue Channel. Dito ay ibabahagi natin ang mga magagandang programa at aktibidad ng pulisya para sa ating mga kababayan. Tinatalakay din dito ang mga serbisyong hatid ng ating kapulisan sa paglaban sa krimen, iligal na droga, at iba pang iligal na aktibidad.
Kasama rin sa programa natin sa telebisyon ang “The TSIP” o Talakayan sa Isyung Pulis na napapanood pa rin sa UNTV News and Rescue Channel tuwing Sabado mula 7:00 hanggang 8:00 ng gabi. Dito ay tinatalakay ang iba’t ibang isyu ng Pambansang Pulisya at kung papaano ang mga ito nabibigyan ng solusyon. Itinatampok din dito ang mga inisyatibo ng ating hanay sa pagpigil ng krimen, solusyon sa krimen at pagpapatupad ng batas para sa ligtas at maunlad na bansa alinsunod sa AMBISYON Nation 2040.
Ang dalawang programang ito ay regular din natin mapapanood sa social media tulad ng facebook at youtube ng ating hanay at ng UNTV. Layunin ng mga ito na mas mapalapit tayo sa mamamayan at mas maihatid natin ang mga makabuluhang balita at impormasyon sa publiko.
Sa tulong ng ating media partner mula sa UNTV/BMPI, ang mga programang ito ay magbibigay daan para sa mas malawak na pagbabahagi ng kaalaman, kamalayan at impormasyon na may kinalaman sa ating mga programa kontra krimen, korapsyon, iligal na droga at terorismo para sa seguridad at kaligtasan ng ating bansa at mamamayang Pilipino.
Lubos nating kinikilala ang kahalagahan ng mga programang ito at taus-puso tayong nagpapasalamat sa buong pamunuan ng UNTV sa kanilang pagbibigay ng oportunidad at free airing ng mga programa sa kanilang istasyon. Nagpapasalamat din tayo sa kanilang pagtulong sa atin upang maisakatuparan ang pagsasahimpapawid ng mga programang ito.
Sa ating mga kababayan, suportahan po natin ito para mas mapalawig pa naming ang pagbibigay-serbisyo at paghahatid ng mga impormasyon para sa kaligtasan at kaalaman ng lahat.
xxx
