Sa mas pinaigting na kampanya laban sa vote buying ngayong katatapos lang na 2025 Midterm National and Local Elections, nakapagtala ang PNP ng 38 vote buying incidents—mas mataas kumpara sa 24 na insidente noong 2023 Barangay at Sangguniang Kabataan Elections.
Ang pagtaas ng bilang ng mga insidente ay nangangahulugang mas pinalakas ang “Kontra Bigay” operations ng PNP, at mabilis ang aksyon ng kapulisan upang masugpo ang ganitong mga iligal na gawain tuwing panahon ng halalan.
Lumabas sa datos na Region 7 ang may pinakamataas na insidente (sampu), sinundan ng Region 1 (pito), at Region 4A na may limang ulat ng vote buying.
Ayon kay Chief PNP, Police General Rommel Francisco D. Marbil, ang pagtaas ng mga ulat ay patunay na tumataas ang tiwala ng publiko sa kapulisan at sa kakayahan nitong pairalin ang batas nang patas at walang kinikilingan.
“Hindi natin kailanman palalampasin ang kahit anong uri ng pandaraya sa eleksyon. Ang mga operasyon natin laban sa vote buying ay patunay ng ating matibay na paninindigan para protektahan ang ating boto at ipatupad ang batas saan mang sulok ng bansa. Hindi lang ito usapin ng statistics—ito ay laban para sa tiwala ng taongbayan sa eleksyon,” ani Gen. Marbil
Hindi maitatanggi sa tagumpay na ito ang aktibong intelligence at preventive actions ng mga regional police offices, at ang epektibong pakikipagtulungan ng buong kapulisan sa COMELEC. Malaking tulong din ang mga information drive, public awareness campaigns, tip lines, at 24/7 monitoring centers gaya ng PNP E-911 hotline, na nagbigay-daan sa publiko para mai-report agad ang mga kahina-hinalang aktibidad na may kinalaman sa vote buying.
Patuloy pa rin ang PNP sa pagsasagawa ng imbestigasyon sa mga naiulat na mga kaso para masampahan ng kaso ang may mga sala. Pinapaalalahanan din ang publiko na mas piliing pagtibayin ang prinsipyo para sa isang malinis na halalan bilang tulong sa isang mapayapa at demokratikong bansa.
Source: PNP FB Page
