Glan Padidu, Sarangani – Nagsagawa ng mangrove propagules planting ang Maritime Sarangani Station sa kanilang Marine Protected Landscape sa Glan Padidu, Sarangani noong ika-7 ng Hulyo, 2022.
Pinangunahan ni Police Corporal Mark Garcia, PCR PNCO katuwang ang Marine Protected Area Guard at Soldiers of the Sea ang pagtatanim ng mahigit 1,000 pirasong propagules kasama ang mga nangangalaga sa naturang lugar upang masiguro na maayos at mabubuhay ang kanilang mga naitanim.
Ayon kay PCpl Garcia, bahagi ang aktibidad na ito sa pagdiriwang ng ika-27th Police Community Relations Month.
Pinasalamatan rin niya ang mga aktibong grupo at indibidwal na walang sawang nakikiisa sa kanilang mga aktibidad.
Kasabay ng pagtatanim ng propagules ay nagsagawa na rin sila ng coastal clean-up sa naturang barangay kung saan ay sako-sakong basura ang kanilang nakuha mula sa dalampasigan.
Simula noong 2021, mahigit 7,000 piraso na ng mangrove ang naitanim ng naturang istasyon.
Hindi lang basta pagtatanim ang aktibidad na ito dahil ang pagsasagawa ng mga ganitong aktibidad ay nakaangkla sa isa sa mga core values ng PNP, ang pagiging Makakalikasan.
###
Panulat ni Patrolman Charnie Mandia
