Agarang rumesponde ang mga kapulisan ng Police Station 1 ng Mandaue City Police Office matapos makatanggap ng email ang Chief of Staff ng tanggapan ng CMO ng isang bomb threat bandang 2:10 ng hapon, Pebrero 15, 2024.
Ayon sa ulat, nakatanggap ng isang email si Ms. Mae Macapobre, Chief of Staff, CMO mula kay Takahiro Karasawa, na naglalaman ng mga pahayag na mayroong itinanim na high-performance bombs sa mga pangunahing pasilidad ng pamahalaan at mga paaralan na hindi tukoy kung saang lugar at lungsod.
Sa tulong ng mga tauhan ng PS1, MCPO sa pangunguna ni Police Major Andy Michael Suguitan Roque, Station Commander, kasama ang EOD K9 unit ng MCPO, agad na nagsagawa ng pagsusuri sa Mandaue City Hall at mga pangunahing paaralan sa lungsod.
Samantala, nagdeploy din ng mga tauhan ang CIDMU upang alamin ang pinagmulan ng email, habang ang mga operatiba ng Initelligence ay nagmonitor sa mga paaralan at pasilidad ng gobyerno.
Upang matiyak ang kaligtasan ng mga mag-aaral, nagpasya ang Department of Education Mandaue City na kanselahin ang lahat ng klase sa lungsod.
Matapos ang masusing imbestigasyon, wala namang natagpuang anumang bomba o pampasabog sa nasabing mga lugar. Gayunpaman, patuloy pa rin ang imbestigasyon upang matukoy ang tunay na nangyari at ang pinagmulan ng email na nagdulot ng pangamba sa publiko.
Ang agarang pagtugon na ito ng kapulisan ay nagpapakita ng dedikasyon at pagsuporta ng programa ng pamahalaan na palakasin ang seguridad at pagpapanatili ng kapayapaan at kaayusan ng bansa tungo sa Bagong Pilipinas.
Source: Spot Report from MCPO
Panulat ni Pat Carla Jane Tanio
